Aðferðir stefnumótunar

            Þegar ráðgjafi er fenginn til aðstoðar fyrirtæki í erfiðleikum eða til að gera gott fyrirtæki enn betra þarf í upphafi að beita aðferðum stefnumótunar.  Í upphafi þarf ráðgjafinn að gera sér grein fyrir stöðu mála, bæði í ytra og innra umhverfi fyrirtækisins.  Þessa stöðu fyrirtækisins þarf svo að tengja saman við markmiðasetningu, þ.e. hvert á að stefna miðað við núverandi stöðu fyrirtækisins.  Þegar staðan er ljós ásamt markmiðum er komið að því að finna út hvaða leiðir eru færar að markmiðunum og velja á milla mögulegra leiða.  Mjög misjafnt er eftir fyrirtækjum á hvaða grunni þau byggja stefnumótun sína. 

            Algengt er að stjórnendur ákveði hvaða vöru eða þjónustu þeir hyggjast bjóða án raunverulegrar tengingar við þá getu sem innan fyrirtækisins er.  Þannig er í raun markaðurinn látinn ráða því hvaða vara eða þjónusta er framleidd.  Hins vegar er mjög vaxandi að stjórnendur byggi frekar á þeirri kjarnafærni sem innan fyrirtækisins er og láti hana stýra framleiðslunni frekar en markaðinn. 

Rekstrargreining, sem fyrr er nefnd, er grundvallaratriði í fyrirtækjarekstri í síbreytilegu rekstrarumhverfi nútímans.  Mjög misjafnt er hvernig staðið er að slíkri rekstrargreiningu.  Við einfalda rekstrargreiningu eru hins vegar nánast undantekningalaust sjáanlegar tiltölulega auðveldar leiðir til úrbóta í rekstri.  Við rekstrargreiningu og stöðumat í henni er mjög mikilvægt að bókhaldsmál og önnur upplýsingakerfi innan fyrirtækisins séu vel skipulögð sem og upplýsingakerfi milli fyrirtækisins og ytra umhverfis þess.