Það hlýtur að heyra til nýjunga á sviði ráðgjafaþjónustu að ábyrgjast árangur ráðgjafar með þeim hætti að ekki þurfi að greiða fyrir þjónustuna nema hún skili viðskiptavininum mælanlegum ábata. Ráðgjafastofan Stjórnun ehf.   í Mosfellsbæ býður fyrirtækjum og stofnunum upp á svokallaða rekstrargreiningu þeim að kostnaðarlausu, að því tilskyldu að greiningin skili þeim engum ábáta. "Sé hins vegar sýnt fram á hagnað eða rekstrarbætur af rekstrargreiningunni þá greiðir fyrirtækið fyrir," segir Jóhann Pétur Sturluson, framkvæmdastjóri Stjórnunar, og er þess fullviss að fyrirtækið muni ekki koma illa út úr því.

"Undantekningalaust hafa þau verkefni sem við höfum tekið að okkur skilað töluverðum ábata og yfirleitt blasir ábatinn við. Hins vegar er erfiðara fyrir þá sem fá þjónustuna að átta sig á fyrirfram hvað geti komið út úr henni," útskýrir hann.  Starfsemi Stjórnunar ehf. byggir á stjórnunar-, rekstrar- og fjármála ráðgjöf og mannauðsstjórnun auk þess sem nýlega er farið að bjóða upp á umhverfisstjórnun fyrir fyrirtæki jafnt sem sveitarfélög. Fyrirtækið tekur ennfremur að sér  hýsingu ýmissa rekstrarþátta þ.á.m. hýsingu framkvæmdastjórnar, starfsmannamála og skrifstofuhalds. 

Upphafið að Stjórnun má rekja til bókhaldsþjónustu sem eigandinn, Jóhann Pétur, rak frá árinu 1990.  Með aukinni menntun Jóhanns á sviði viðskipta, stjórnunar og stefnumótunar færðist starfsemi fyrirtækis hans hins vegar í það horf sem nú er, að vera ráðgjafastofa.  Jóhann Pétur segir að stærstur hluti þeirra verkefna sem fyrirtækið fáist við hafi með rekstrarráðgjöf að gera, þá sér í lagi svokallaða rekstrargreiningu þar sem beitt sé mörgum ólíkum aðferðum stjórnunarfræða til að efla og styrkja markaðsstöðu tiltekinnar rekstrareiningar.  "Rekstrargreiningin felst í að farið er inn í fyrirtæki og reksturinn krufinn m.a. með skoðun á bókhaldsgögnum og aðferðum mannauðsstjórnunar.  Þetta er gert með það fyrir augum að finna þætti sem má færa til betri vegar og vinna út frá til breytinga hjá viðkomandi fyrirtæki," segir hann. 

Jóhann Pétur er eini eigandi Stjórnunar og annar tveggja fastra starfsmanna. Hann segir markmiðið vera að takmarka fjölda starfsmanna og utanumhald um rekstur Stjórnunar. Hins vegar nýti hann viðamikið tengslanet við sérfræðinga á ýmsum sviðum með þeim hætti að þegar unnið er í stærri verkefnum eða sérhæfðari verkefnum, kalli hann til aðstoðar viðeigandi sérfræðinga eftir því sem þurfa þykir.  Að sama skapi segir hann ekki þurfa mikla yfirbyggingu um reksturinn enda fari starfsemin fram meira og minna inni í þeim fyrirtækjum sem Stjórnun ehf. vinnur fyrir hverju sinni.

Hýsing stjórnunarþátta er nokkuð sem hefur verið að aukast á Íslandi og Jóhann Pétur segir þann þátt vaxandi í starfsemi Stjórnunar. Það byrji gjarnan með hýsingu fjármála þ.e. að Stjórnun taki að sér umsjón fjármála í minni fyrirtækjum eða samningagerð. Í einstaka tilfellum hafi verið um að ræða hýsingu alls skrifstofuhaldsins, t.d. launavinnslu, greiðslu reikninga og þess háttar.  En Stjórnun gengur skrefinu lengra og býður upp á hýsingu framkvæmdastjórnar, þ.e. tekur að sér yfirstjórn lítilla og meðalstórra fyrirtækja. Um hvort stjórnendur fyrirtækja séu tilbúnir til að láta stjórnunina af hendi segir Jóhann Pétur að slíkt gerist ekki nema búið sé að byggja upp traust og reynsla sé komin á samskiptin. Hann segir hýsingu framkvæmdastjórnar henta í nánast hvers konar starfsemi en Stjórnun hafi mest starfað á byggingarsviði, með byggingarverktökum sem vilja einbeita sér að því sem þeir eru sérfræðingar í en hafi litla reynslu af stjórnunarlegum þáttum svo sem samningagerð. 

Jóhann Pétur kannast ekki við að eiga sér neina ákveðna keppinauta en nefnir þó stórar endurskoðunarskrifstofur sem hafi á að skipa ýmiskonar sérfræðingum. Hann líti samt ekki á þær sem beina keppinauta.

Smelltu hér til að hafa samband